Ֆիլմերի ցուցադրություն ՆԱՄ-ում

2026-11-03 15:00 | Naregatsi Art Institute

«Մանուկն աշխարհին». «Մանուֆեստ» փառատոնի ֆիլմերը «Նարեկացի» արվեստի միությունում

Նոյեմբերի 3-ին «Նարեկացի» արվեստի միությունում տեղի ունեցավ «Մանուֆեստ» մանկապատանեկան ֆիլմերի միջազգային փառատոնի ֆիլմերի ցուցադրություն։ Հանդիսատեսին ներկայացվեցին հայկական, ռուսական և չեխական արտադրության կինոնկարներ։

Ցուցադրված աշխատանքների շարքում էին Արմավիրի արվեստի քոլեջի ուսանող Միլենա Եդիգարյանի «Գտնելով տունը» և «Երեկույթ» անիմացիոն ֆիլմերը։ 15 ամյա ռեժիսորը պատմեց մուլտֆիլմերի ստեղծման ընթացքի մասին։ «Սկզբում կարճ հատվածներ էի տեղադրում սոցիալական ցանցերում, հետո աշխատանքներս նկատեցին և առաջարկեցին մասնակցել փառատոնների», — նշեց Միլենա Եդիգարյանը։

Փառատոնը վաղուց դուրս է եկել սովորական կինոփառատոնի շրջանակներից՝ վերածվելով ծավալուն կրթական, սոցիալական և մշակութային նախագծի։ Դրա հիմնական առաքելությունն է մշակույթն ավելի հասանելի դարձնել երեխաների համար։ Ծրագրի թիրախում են գտնվում հատկապես սոցիալապես անապահով ընտանիքների, ծնողազուրկ, ինչպես նաև հաշմանդամություն ունեցող երեխաները։

Այս տարվա փառատոնի խորագիրն է «Մանուկն աշխարհին»։ Կազմակերպիչների ընդգծմամբ՝ փառատոնի «սիրտը» հենց երեխաներն են, իսկ ավելի ճշգրիտ՝ «6-ից 100 տարեկան երեխաները», քանի որ յուրաքանչյուր մեծահասակ հոգու խորքում պահպանում է իր մանկական աշխարհը։

Փառատոնն ունի մեծ աշխարհագրություն։ Մասնակցում են ֆիլմեր աշխարհի տարբեր ծայրերից, այդ թվում՝ Ֆրանսիայից, Կանադայից, Ճապոնիայից, Ֆինլանդիայից, Իտալիայից, Լեհաստանից, Ռուսաստանից, Իրանից և այլ երկրներից։
Երկարամյա գործընկերություն

«Մանուֆեստ»-ը տարիներ շարունակ սերտորեն համագործակցում է «Նարեկացի» արվեստի միության հետ, որտեղ ավանդաբար անցկացվում են ամենամյա ցուցադրությունները։ Կազմակերպիչների փոխանցմամբ՝ ձևավորված ջերմ ու կայուն հարաբերությունների շնորհիվ միությունում անցկացվող միջոցառումները մշտապես աչքի են ընկնում հանդիսատեսի մեծ հետաքրքրությամբ։